Monte Galiñeiro

Co seu cume alcanzando os 709 metros de altura, o Monte Galiñeiro ergue a súa silueta rochosa sobre os vales que o rodean, converténdose nun miradoiro natural privilexiado sobre o sur de Galicia. A medida que se ascende polas súas ladeiras, as vistas van gañando amplitude, ata ofrecer panorámicas impresionantes desde os seus outeiros graníticos.

Este macizo, tan característico pola súa paisaxe de penedos e formas esculpidas polo tempo, é tamén un destino de referencia para os amantes da escalada, que atopan aquí unha ampla zona con numerosas vías de diferente dificultade para a práctica deste deporte en contacto directo coa natureza.

Nas partes máis altas do Galiñeiro, preto do seu cume, foron atopados restos que se interpretan como un muro defensivo de posible orixe galaicorromana, indicio de que este lugar xa tiña un uso estratéxico ou habitacional en tempos antigos. A súa posición elevada e a ampla visibilidade do contorno explican o seu valor defensivo no pasado.

Desde o Galiñeiro, especialmente cara o nordeste, pódese contemplar unha das máis completas panorámicas do Val Miñor: A Serra da Groba, a Foz do río Miñor, a Enseada de Baiona ou a Ría de Vigo, coa súa espectacular visión das Illas Cíes e a Península do Morrazo. Un espectáculo visual en calquera época do ano.

Moi preto , atópase a zona de Auga da Laxe, un espazo natural tranquilo onde se localiza un importante xacemento arqueolóxico. A paisaxe aquí está marcada por prados (froito da actividade gandeira tradicional), monte baixo e zonas arboradas con piñeiros, eucaliptos, castiñeiros e outras especies autóctonas, que lle dan un toque de serenidade e frescura á contorna.

Como chegar

O acceso ao Galiñeiro pode facerse en coche por pista asfaltada ata moi preto do cume. Porén, é recomendable continuar a pé, seguindo camiños que permiten descubrir os seus encantos naturais paso a paso.

Para os que buscan relaxarse, a área de lecer do Galiñeiro é ideal para pasar o día, facer un picnic ou simplemente desfrutar da paisaxe. E para quen queira profundar máis na súa exploración, existe o sendeiro PR-G1.1 Galiñeiro, unha ruta sinalizada que percorre os recunchos máis fermosos da serra e permite conectar co espírito do monte.

Características